زيادة الضرائب على السجاير والمعسل

زيادة الضرائب على السجاير والمعسل لتعيض عجز الميزانية خلى بالكم ستوجه هذه الزيادة للعلاج على نفقة الدولة اللى اتنهب بالملايين
مع العلم إن بعض أعضاء مجلس الشعب من غير الحزب الطنى طبعاً اقترحوا توفير العجز من بنود أو جهات آخرى غير زيادة الضرائب على السجائر والمعسل
طبعاً جهابذة الحزب الوطنى علقوا بأن القانون حكيم علشان نحافظ على صحة الناس ويبطلوا تدخين أو يقللوا التدخين
طب لو الناس بطلوا تدخين حتجمعوا عجز الميزانية منين , هما بيضحكا علينا لا على نفسهم
ماهو لو الناس دى تفكرهم صحيح ويهمهم صحة الناس طب مايمنعوا السجاير المشكله مش فى السجاير لا المشكله فى زيادة الضرايب مش لو على التدخين لأ لو على الحشيش والكوكايين زيادة الضرايب حتى لو على المومسات هى دى المشكلة
ماهو أنا بياع فجل بدخن بدخن زادة أسعار الدخان تفتكروا ممكن أسكت لما جزء من دخلى اللى بيكفينى بالكاد ينقص أبداً إما حا ازود سعر حزمة الفجل أو حقلل حزمة الفجل علشان الحزمة ما تكفيش المستهلك ويضطر يشترى واحدة تانى يقوم المستهلك بدوره يعمل زى بتاع الفجل وكل برغت على قد دمه يزود هكذا دايرة
الموضوع مش انا ماعنديش مشكله علشان انا مش بدخن لا انا بتعامل مع ناس بدخن الناس دى حتخسر وعاوزه تعوض خسارتها
الحل ياسادة مش فى ذيادة الضرائب * لا الحل دايماً فى زيادة الإنتاج وعدالة توزيع الثروة وتحصيل حق الدولة فى الضرائب الحل فى إنفاق الحكومة الميزانية فى أوجه إنفاقها الصحيح حتى يقتدى بها المواطن
عرفتوا الحل فين كوكو كوكو إصحوا يانايمين

مع ان الجهاز كان يعمل لكن مع الوقت وتكرار التشغيل أصبح متهالك ربما إنتهت مدة صلاحيته أو يحتاج إلى تغير بعض قطع غيار لذا فكلما تم تشغيله يقوم الزر الأتوماتيكى بإقاف العمل وتكرر ذلك كل مره ولأننا كمصريين ملوك الفهلوة قام الباشمهندس بعمل كوبرى وهكذا عاد الجهاز للعمل
ابتسم الجميع شوف عبقرية المصرى مايغلبه غلاب
بعد نصف ساعة كان الذُعر يلف الجميع فقد انتشر دخان خانق تبعته ألسنة اللهب احتراق الجهاز ومعه كل شئ
ايه السبب الكوبرى
أصبحت حياتنا كلها كبارى
كى تأخذ شئ ليس من حقك تحتاج إلى كوبرى
الأفظع أنك كى تأخذ حقك تحتاج إلى كوبرى
بل أن المواطن أصبحت منزلته الإجتماعية تقاس بعدد الكبارى التى يستطيع أن يصنعها
فلكى تستطيع العيش لابد أن تصنع كوبرى فى التعليم والصحة والتموين و الجمارك و الداخليه والعدل। وووووووووو
فى كل شئ حتى أنبوبة البوتاجاز أصبحت تحتاج إلى كوبرى , دى عيشه سوده مش كده ؟
ياويلك لو الكوبرى اتقلب عليك , أو يجى واحد ويعمل كوبرى أعلى من الكوبرى اللى انت عملته
طب أيه اللى يخلينا نلجأ للكبارى ؟
أكيد ماحدش فينا مش عاوز ياخد حاجه مش من حقه
طب مين اللى بيشجع على عمل الكبارى وبيروج ليها
أكيد واحد إنتهازى ضعيف كسول أو عنده كوبرى كبييييييييييييييييييييييييييييييير
الحكليه ببساطه إنك فرد واحد استعملت كام كوبرى علشان تاخد حقك
طب انت حتستحمل كام واحد يستعملك كوبرى وممكن تكون لأشياء غير قانونية
وإذا كنا كلنا بنستعمل الكبارى طب ليه نتعب نفسنا ما نخلى العلاقة مابينا و بين بعض طبيعية بدون كبارى لا احنا غاويين تعب وطلوع ونزول ونشفان ريق
المهم مش كفابة إنك تكون عارف المشكلة دى
مش كفاية إنك تكون ما بتستعملش الكبارى
شئ مهم إنك تفهم اللى حواليك ده وإننا نحتقر اللى بيلجأ لهذه النقيصة نرفض تصرفه وننبذه من بينا
لأنها فى النهاية حتتسبب فى حريق والقضاء على الجميع
والنار اللى بعيد عنى دخانها بيخنقنى و بكره حتوصلنى

خليك إيجابى قوم وكوكو كوكو اصحى من النوم

مرحباً بكم

صباح الخير

إصحوا يا نايمين

وأهلاً بكم طبعاً البيت بيتكم


انا متأكد إنكم طالما وصلتم هنا تبقوا صاحيين

لكن مش كل واحد مفتح عنيه يبقى صاحى

لأن فيه حجات بنبقى شايفينها ومش شايفنها

علشان كده قلت أرحب بيكم هنا علشان نتواصل

مش كفايه إنك تكون فاهم فتحس إن الناس كلهم فاهمين اللى أنت فاهمه لابد نعبر عن نفسنا علشان نشوف بعضنا صح

عموماً أهلاً بيكم ومرحبا